तीसौं गृष्मकालीन ओलम्पिक खेलकुदको उद्घाटन आज बेलुका पूर्वीलन्डनको स्टामफोर्ड रंगशालामा हुँदैछ । बेलायतकी महारानी एलिजाबेथ द्वितीयाले उद्घाटन गरेपछि विश्व खेलकुदको कुम्भमेला औपचारिक प्रारम्भ हुनेछ ।

ओलम्पिकको औपचारिक सुरुआत आज हुने भए पनि महिला र पुरुष फुटबलका समूहचरणका खेल भने प्रारम्भ भइसकेका छन् ।

ओलम्पिकको असली रन्को भने उद्घाटन समारोहपछि सुरु हुने भएकाले आयोजकले लन्डनको आजको साँझलाई रंगीन बनाउन विशेष तयारी गरेको छ । सम्पूर्ण समारोहको जिम्मा स्टेज सोका प्रस्तुतकर्ता स्टेभन डाल्र्डीले लिएका छन् ।

स्लमडग मिलेनियरबाट ओस्कर अवार्ड जितेका ड्यानी बोयलले तीन घन्टा लामो उद्घाटन समारोहको साजसज्जाको सम्पूर्ण कार्यक्रम तयार पारेका हुन् । आइसलेस अफ वन्डर संज्ञा दिइएको ओलम्पिक उद्घाटन समारोह महान् नाटककार विलियम सेक्सपियरको कृति द टेम्पेस्ट बाट प्रेरित हुनेछ ।

उद्घाटन समारोहमा दुई सय चार राष्ट्रका १६ हजार खेलाडी उपस्थित हुने छन् भने १० हजार स्वयंसेवकले आफ्नो कला प्रदर्शन गर्नेछन् । यसपटक उद्घाटनमा जनावरको पनि प्रयोग गरिने भएको छ ।

यसका लागि ७० वटा भेडा, १२ वटा घोडा, १० वटा कखुरा, तीनवटा गाई, दुईवटा बाख्रा तथा विभिन्न प्रकारका कुकुर र हाँसको प्रयोग गरिने बेलायती सञ्चारमाध्यमले जनाएका छन् ।

लन्डन ओलम्पिक आयोजक समितिका प्रमुख सेबास्टियन कोयका अनुसार लन्डनको उद्घाटन अहिलेसम्मकै भब्य हुनेछ । उद्घाटन समारोहका लागि मात्र चार करोड ३० लाख अमेरिकी डलर खर्च गरिने भएको छ । ६२ हजार दर्शकले रंगशालामा समारोहको प्रत्यक्ष अवलोकन गर्नेछन् । विश्वका करोडौं खेलप्रेमीले टेलिभिजनबाट समारोह हेर्ने छन् ।

नेपालबाट लन्डन ओलम्पिकमा पाँच खेलाडी सहभागी छन् । त्यसमा पौडीका श्रेया धिताल र प्रसिद्धजंग शाह, एथलेटिक्सका प्रमिला रिजाल र तिलकराम थारु तथा सुटिङकी स्नेहा राणा छन् । नेपालको झन्डा प्रसिद्धले बोक्ने भएका छन् नयाँ राष्ट्रका रुपमा दक्षिणी सुडानले ओलम्पिकको पाँच रिङको झन्डामुनि मार्चपास्ट गर्नेछ ।