बेलायतको राजधानी लण्डनमा आयोजना हुने ३० औं गृष्मकालीन ओलम्पिकको हिजो राति भव्य उद्घाटन भएको छ । बेलायती महारानी एलिजावेथको उपस्थितिमा सम्पन्न उद्घाटन समारोहमा विश्वका २०४ देशका १० हजारभन्दा बढी खेलाडीले मार्चपास गरेका थिए ।

लण्डनको स्ट्रामफोर्डस्थित पार्क रंगशालामा भएको उद्घाटन समारोहमा टुर दि फ्रान्सका विजेता वेलायती ब्रेड्ली विग्गिन्सले घण्टी बजाएर उद्घाटन समारोह सुरु गरेका थिए । आयल्स अफ वन्डर नाम दिइएको उद्घाटन समारोहमा बेइजिङ ओलम्पिकलाई बिर्साउने गरी फरक शैलीमा बेलायतमा भएको आर्थिक क्रान्ति र त्यसले ल्याएको परिर्वतनलाई देखाइएको थियो ।

बेलायतले ओलम्पिक आयोजना गरेको यो तेस्रो पटक हो र यसअघि सन् १९०८ मा र दोस्रो विश्वयुद्धपछि सन् १९४८ मा दोस्रोपल्ट आयोजना गरिसकेको छ । विश्वका २ सय ४ देशले ३६ खेलका बेग्लाबेग्लै ३ सय ४ वटा इभेन्ट्समा भाग लिने यो खेलका लागि १० हजार ५ सय हाराहारी खेलाडी र अफिसियलहरू आइसकेकाले लन्डन अहिले भीड र व्यस्त छ ।

खेलाडी र अफिसियल ओलम्पिक भिलेजमा छन् । ३७ प्रतियोगितास्थलमध्ये २७ लन्डनमै भएकाले खेलाडी र पदाधिकारीको भीड सर्वत्र देखिन्छ । यतिखेर विश्वभरका करिब १० लाख पर्यटक लन्डन ओइरिएका छन् ।

खेलस्थल वरपर सार्वजनिक सवारी आवागमन बन्द गरिएको छ भने भीआईपी र खेलाडीलाई सहजरूपमा प्रतियोगिता स्थलसम्म जान आउन ओलम्पिक लेन बनाइएको छ । लेनमा नहिँड्नेले १ सय ३० पाउन्ड जरिवाना तिर्नुपर्नेछ ।

ओलम्पिक खेलका लागि ४ हजार ७ सय मेडल उत्पादन गरिएका छन् ।

ओलम्पिकको उद्घाटन लगत्तै आज सुटिङ तर्फ नेपाली खेलाडी स्नेहा राज्यलक्ष्मी राणाले प्रतिश्पर्धा गर्नुहुनेछ । अन्तिम समयमा वाइल्ड कार्ड मार्फत ओलम्पिकको यात्रा तय गर्नुभएकी स्नेहाले आजको खेलमा राम्रो प्रदर्शन गर्दै राष्ट्रिय किर्तिमानमा सुधार गर्ने अपेक्षा गरिएको छ ।

नेपाली खेलाडीहरुबाट पदकको कुनै आशा नगरिए पनि उनीहरुबाट विगतमा उनीहरुले कायम गरेको कीर्तिमान तोडिने अपेक्षा गरिएको छ ।

प्रतियोगिता अन्तर्गत आज सुटिङसंगै आर्चरी, ब्याटमिन्टन, भारोत्तोलन, फुटबल, बास्केटबल लगायत १९ खेलका विभिन्न खेलहरु हुनेछ ।

लन्डन ओलम्पिकमा नेपालबाट स्नोहासँगै पौडीका श्रेया धिताल र प्रसिद्धजंग शाह, एथलेटिक्सका प्रमिला रिजाल र तिलकराम थारुले सहभागिता जनाएका छन् । लण्डन ओलम्पिकमा सहभागी देशका खेलाडीहरुले २६ खेलका ३ सय ४ इभेन्ट्समा पदकका लागि प्रतिश्पर्धा गर्नेछन् ।