एसियाली फुटबल महासंघ (एएफसी)का प्रतिबन्धित अध्यक्ष मोहम्मद विन हमामले एएफसीमै कार्यरत एन्फा अध्यक्ष गणेश थापाका छोरा गौरब थापाको खातामा एक लाख अमेरिकी डलर जम्मा गरेको सार्वजनिक भएपछि अख्तियार द्रुपयोग  अनुसन्धान  आयोगले यो विषयमा चासो देखाएको समाचार छ ।

आयोगका प्रवक्ता इश्वरीप्रसाद पौड्यालले केही दिन अघिबाट छानविन सुरु भएको जनाउँदै गौरव कहाँ कार्यरत छन्, पहिला कहाँ थिए। सार्वजनिक पद धारण गरेका व्यक्ति हुन की होइनन् ? यी सबै विषयमा छानविन हुने बताउनुभएको छ ।

एन्फा अध्यक्ष गणेश थापाका छोरा गौरव थापाको खातामा जम्मा भएको १ लाख अमेरिकी डलरका विषयमा अख्तियार दुरुपयोग अनुसन्धान आयोगले छानविन सुरु गरेको र गौरवको विषय आयोगको दायराभित्र पर्ने नपर्ने छानविनपछि मात्र बताउन सकिने बताउनुभएको छ ।

एन्फा अध्यक्ष थापाले हमामले आफ्ना छोरा गौरवलाई सन् २००९ मा सापटीका रूपमा एक लाख अमेरिकी डलर दिएको स्वीकार्दै पटक पटक गरी फिर्ता गरिसकेको दाबी गर्नुभएको छ ।

अन्तर्राष्ट्रिय एकाउन्टिड फर्म प्राइस वाटर हाउस कूपर्स (पिडब्लूसी)ले तयार पारेको एएफसीको लेखा परीक्षण प्रतिवेदन अनुसार गौरवसहित एयिसा विभिन्न राष्ट्रका फुटबलकर्मीलाई हमामले हजारौं अमेरिकी डलर दिएको अमेरिकी समाचार एजेन्सी एपीले गत साता सार्वजनिक गरेको थियो।

झन्डै ५ बर्षदेखि एएफसीमा कार्यरत गौरव कम्पिटिसन डिभिजनअन्तर्गत हेड अफ युथ कम्पिटिसन पदको जिम्मेवारी सम्हालिरहेका छन्। जारी ओलम्पिकअन्तर्गत फुटबलमा न्युक्यास मैदानको सहायक मेनेजरका भुमिकामा हाल उनी लन्डनमा छन्।