नेपाली भाषा साहित्यमा आख्यान विधाका मुर्धन्य स्रष्टा स्व. रमेश विकलको पूर्णकदको शालिक अनावरण गरिएको छ । काठमाडौंको गोकर्णेश्वर नगरपालिका वडा नं. ९ आरुबारीस्थित रमेश विकल साहित्य प्रतिष्ठानको प्रांगणममा स्थापना गरिएको शालिक उहाँको ९२ औं जयन्तीका अवसरमा अनावरण गरिएको हो ।

प्रतिष्ठानका अध्यक्ष रोचक घिमिरेको सभापतित्वमा सम्पन्न कार्यक्रममा गोकर्णेश्वर नगरपालिकाका नगरप्रमुख सन्तोष चालिसेले एक समारोहकाबीच अनावरण गर्नुभएको हो ।

कार्यक्रमलाई सम्बोधन गर्दै नगरप्रमुख चालिसेले गोकणेश्वर नगरपालिकाले नेपाली भाषा साहित्यका साधकहरुको सम्मानमा र साहित्यको श्रीवृद्धिमा कुनै कसर बाँकी नराख्ने जनाउँदै रमेश विकल साहित्य प्रतिष्ठाका हरेक गतिविधिमा साथ दिने प्रतिबद्धता जनाउनुभयो ।

कार्यक्रममा गोकर्णेश्वर नगरपालिकाका उपप्रमुख शान्ति नेपाल, डा. विदुर चालिसे, शान्ति रिसाल, नगर सलाहकार दपक रिसाल, रमेश विकल साहित्य प्रतिष्ठानका उपाध्यक्ष तथा नेपाल कला प्रज्ञाप्रतिष्ठानका उपकुलपति केके कर्माचार्य, रोचक घिमिरे लगायतले स्व. विकलको व्यक्तित्वका बारेमा प्रकाश पार्नुभएको थियो ।

त्यसै गरी प्रतिष्पठानका महासचिव साहित्यकार एवं वरिष्ठ पत्रकार विजय चालिसेले प्रतिपष्ठान स्थापनादेखि शालिक अनावरणसम्म नेपाल सरकार, प्रदेश सरकार तथा स्थानीय निकायबाट प्राप्त सहयोगको सह्राना गर्दै भावी दिनमा निरन्तर सहयोग प्राप्त भैरहने विश्वास व्यक्त गर्नुभयो ।

स्व. विकलको शालिक गोकर्णेश्वर नगरपालिकाको १५ लाख रुपैयाँ आर्थिक सहयोगमा कलाकार लक्ष्मण भुजेलले बनाउनुभएको हो ।

सोही समारोहमा अभिनव साहित्य प्रतिष्ठानले स्थापना गरेको रमेश विकल बाल साहित्य पुरस्कार प्रदान गरिएको थियो । विद्यालय तहका बालबालिकाबीच आयोजना गरिएको आँसु कविता प्रतियोगितामा प्रथम, द्वितीय र तृतीय हुने क्रमशः विभूति अधिकारी, इन्दिरा थापा र सदिस्मा अधिकारीलाई पुरस्कृत गरिएको हो ।